Monday, 25 February 2013

விநோதினி, வித்யா, நான், நீ..

புதிய தலைமுறையில் நேற்று வித்யா சம்பவம் தொடர்பாக விவாதம் நடைபெற்றது. அதில் ஆசிட் அமிலத்தை ஒரு கடையில் எவ்வளவு எளிதாக வாங்கிடலாம் என்ற கோப்புக் காட்சியும் ரகசியமாக படம் பிடித்துக் காட்டப்பட்டது. மனுஷ்யபுத்திரனின் கூற்றுப்படி, இக்காட்சியானது இரண்டுவிதமாகப் பார்க்கப்படும். எளிதாகக் கிடைக்கும் இவ்வகை அமிலத்தை தடை செய்யக்கூறும் கண்ணோட்டம் முதலாவது. மற்றொன்று, “இவ்வளவு எளிதாகக் கிடைக்குமா.. நாமும் இதையே உபயோகித்துவிட வேண்டியதுதான்“ என்ற மனநோயாளியின் கண்ணோட்டம்.
ஒரு சகமனுஷியை, தனக்கு கிடைக்காத ஒரு பொருளாய், அதன் மீது வன்மம் கொண்டு பழிதீர்த்துக்கொள்ளும் மனிதநேயமிக்க செயலை, ஆணாதிக்கம் என்றும் மிருகத்தனம் என்றும் ஆளாளுக்கு வசைபாடி புகழாரம் சூட்டிவிட்டு, அவரவர்தம் பணிகளில் ஆழ்ந்துவிடுவது, காலங்காலமாக நடந்தேறிக்கொண்டிருப்பது தான்.
ஆண் குழந்தை புத்தகம் படிப்பது போலவும், பெண் குழந்தை காய் நறுக்குவது போலவுமான படங்கள் இன்றளவும் பாடப்புத்தகத்தில் இடம்பெறத்தான் செய்கின்றன. எவ்வளவுதான் உயரவே பறந்தாலும் பெண் என்பவளுக்கான வரையறைக் கோடுகள் ஒரு வட்டத்திற்குள்ளேயே அடங்கிவிடுகின்றன.. அல்லது அடங்கவேண்டுமென நினைக்கப்படுகின்றன. இவள் எனக்காகப் படைக்கப்பட்டவள், எனக்குச் சொந்தமானவள் என்கிற எண்ணம் தோன்றும்போதே தன்னிச்சையான ஒருவகை ஆதிக்க மனப்பான்மை வேரூன்றி விடுகிறது.
தன் வாழ்வின் மிச்ச நாட்களைப் பகிர்ந்துகொள்ள ஒரு துணை தேவை என்பதன் பூர்த்தியே பெண் என்பது பெரும்பாலும் புரியப்படுவதில்லை. தன்னையோ தன் குடும்பத்தையோ கவனித்துக்கொள்ளவே அவள் படைக்கப்பட்டிருக்கிறாள் என்பது தான் முன்னிலை வகிக்கிறது.
இந்த வித்யாவும் வினோதினியும் நமக்கருகிலோ அல்லது நம்முடனேயோ, ஏன் நாமாகக்கூட  இருக்கக்கூடும் அடுத்தொரு குரூரச் சம்பவம், இவர்களை மறக்கடிக்கவும் செய்யலாம். நாமும் மறந்துவிட்டு வழக்கமான பணிகளில் ஈடுபடுவோமாக..
நாடும் நாட்டு மக்களும் நாசமாய்ப் போக வாழ்த்துக்கள்..!
.
.

Monday, 11 February 2013

விஸ்வரூபம் – என் பார்வையில்..




படம் முழுக்க கமல்.. கமல்.. என கமல்ஹாசனின் ஆக்கிரமிப்புகள் தான். பல இடங்களில் அமைதியாக, நடிப்பில் அசத்துகிறார். ஆரம்பக்காட்சிகளில் கதக் மாஸ்டராக வரும் கமல் தான் மனதில் நிற்கிறார். குறிப்பாக நடனப்பயிற்சி முடிந்ததும் வரும் தொலைபேசியை எடுக்க, மெலிதான ஓட்டத்துடன் வரும் காட்சி.. ஸ்பெஷல் அப்ளாஸ் கமல் ஜி. கைகளைக் கட்டிப்போட்டபடி உண்மைகளை கூறுமாறு கேட்கும் தீவிரவாதியிடம், பெண்மை கலந்த கண்சிமிட்டலுடன் பதில் சொல்வது கதாப்பாத்திரத்திற்கே உரிய யதார்த்தம்.
இந்தப் படத்துல ஆண்ட்ரியா எதுக்குனே தெரியல. அவ்வப்போது வந்து போவது தவிர நடித்ததாய் தெரியவில்லை. பாடல்கள் சுமார் ரகம் தான். காதல் ரோஜாவே படத்துல வந்த பூஜா குமார் தானே இது? வயசே தெரியல. அவருக்கு அபிராமியின் டப்பிங் குரல் கணகச்சிதம். இருந்தாலும் தசாவதாரம் ஹீரோயினின் வாயாடித்தனம் வந்துபோகுது.
வெளிநாட்டுல நடக்குற கதைங்குறதால நிறைய வேற்று மொழிகள் உலவுது. இருந்தாலும் சாமான்யனுக்கு சத்தியமா புரியுறது கஷ்டம். இத்துனூண்டா தமிழ்ல எழுத்துக்கள் போட்டாலும் தேடிப் படிக்கிறதுக்குள்ள அடுத்த காட்சி போய்டுது. அதென்னப்பா... தமிழ் சினிமாவுல வர்ற FBI மட்டும் இவ்ளோ தத்தியா இருக்காங்க. ஹீரோ ஹீரோயின் எதப் பண்ணினாலும் ஆ“னு வாயப்பொழந்துகிட்டு ஆச்சர்யப்படுறாங்க. வழக்கமான சினிமாத்தனம். ஜேம்ஸ்பாண்ட் அளவுக்கு ஏதோ ஒரு ஏஜேன்ட்னு சொல்றதையும் சேத்துக்கலாம்.
தாலிபான்கள்.. ஜிகாதிகள் என ஏற்கனவே நிறைய படித்தாயிற்று. அதுனால அதுபத்தி எழுதி போர் அடிக்கல. வசனங்கள்ல கூர்மை கம்மி தான். இன்னும் கொஞ்சம் கவனம் செலுத்தியிருக்கலாம்.

Overall  கண்டனங்களும் பரபரப்புகளும் நடந்த அளவுக்கு படம் வொர்த் இல்லையோங்குறது என்னோட தனிப்பட்ட அபிப்ராயம்.

.
Related Posts Plugin for WordPress, Blogger...