Tuesday, 31 August 2010

உங்கள் காதலிக்குப் பிடித்தமானவரா நீங்கள்??



நீங்கள் காதலித்துக்கொண்டிருப்பவராக இருந்தால் உங்கள் காதலிக்குப் பிடித்தமானவராக நடந்துகொள்ள இதோ சில ஆலோசனைகள்.. (அபத்தமானதாக இருந்தாலும் சகித்துக்கொள்ளுங்கள்).

  1. அடிக்கடி அவர்களிடம் ஐ லவ் யூ சொல்லுங்கள்.

  1. அவர்களை ஏதாவது ஒரு செல்லப்பெயர் வைத்து அழையுங்கள்

  1. இந்த டிரெஸ் உனக்கு ரொம்ப அழகா இருக்கு, நீ சிரிக்கிறது அழகாயிருக்கு, உனக்கிந்த ஹேர் ஸ்டைல் நல்லாயிருக்குனு பாக்கும்போதெல்லாம் எதையாவது சொல்லனும்

  1. அவங்களுக்கு ரொம்ப பிடிச்ச ஒரு பாடலை ரிங்டோனா வச்சுக்கங்க.

  1. அடிக்கடி SMS பண்ணுங்க. குறிப்பா காலையில் எழுந்தவுடனேயும் தூங்கும் முன்னும் மறக்காம அனுப்புங்க.. (அதாவது உங்கள் நாளின் ஆரம்பமும் முடிவும் அவர்களுடன் தான் என்பதை உணர்த்துங்கள்)

  1. கேட்ட கேள்விக்கு மட்டுமோ அல்லது வெறும் ‘K’ (OK) என்று ஒற்றை வார்த்தையிலோ ரிப்ளை செய்தால் அவர்கள் கோபமாக இருக்கிறார்கள் என்று அர்த்தம்.

  1. போன் பேசும்போது சண்டை வந்தால் எக்காரணம் கொண்டும் நீங்களா கட் பண்ண கூடாது.. (அத அவங்க செய்யலாம்)

  1. அவங்க கேக்கலனாலும் அப்பப்போ அவங்க போனுக்கு டாப்அப் பண்ணி விடுங்க.

  1. ஏதாவது ஒரு டாபிக் அவர்களுக்கு பிடிக்கலனா அதுபற்றி பேசாதீங்க.

  1. கருத்துவேறுபாடு வந்து பேசாம இருந்தாங்கனா 'மிஸ் யூ' மெசெஜா வரிசையா அனுப்புங்க. அவங்க கோபத்தை குறைக்கும்.

  1. நீங்க சாப்பிட்றீங்களோ இல்லையோ, எவ்ளோ வேலை இருந்தாலும் 3 வேளையும் கரெக்ட்டா போன் (இல்லனா மெசெஜ்) பண்ணி சாப்டியா?னு அவங்கள கேளுங்க.

  1. அவங்களோட பிறந்தநாள், முதல் சந்திப்பு இப்படி முக்யமான நாளையெல்லாம் ஞாபகம் வச்சு சர்ப்ரைஸா கிப்ட் கொடுத்து அசத்துங்க. (அவங்களுக்கு ஞாபகத்துல இருந்தாலும் உங்களுக்கு நினைவிருக்கானு டெஸ்ட் பண்ணுவாங்க.. அதுனால ஜாக்கிரதை)

  1. அவங்க எங்கயாவது வெளில போனாங்கனா அவங்களுக்கு முன்னாடி அங்க போய் நில்லுங்க.. உன்ன பாக்கணும்போல இருந்தது, அதான் வந்தேனு சொல்லுங்க.

  1. எந்த சூழ்நிலையா இருந்தாலும் பாக்கவே முடியலைனாலும் தினமும் தூங்குறதுக்கு முன்னாடி ஒரு மணிநேரமாவது அவங்க கிட்ட மனசு விட்டுப் பேசுங்க.

  1. சண்டை வந்ததுனா ஆண்கள் தான் இறங்கி வந்து தங்கள சமாதானப்படுத்தணும்னு பொண்ணுங்க நெனப்பாங்க..

  1. ரொமான்ஸா பேசுறோம்னு கண்டபடி எதையாவது உளறி, வளிஞ்சு சொதப்பிடாதீங்க.. டீசன்ட்டா அப்ரோச் பண்ணுங்க.

  1. பொதுவா பெண்கள் கோபத்தையோ பிடிக்காததையோ வெளிப்படையா சொல்லமாட்டாங்க. ஆண்கள் தானாக புரிந்துகொள்ளனும்னு நெனப்பாங்க. அதுனால எதுனாலும் அவங்கள கலந்துகிட்டு முடிவெடுங்க.

  1. அவர்களது தோழிகளிடம் பேசும்போது அளவோடு பேசுங்கள். இதுவே பெரும்பாலான சண்டைக்கு வழிவகுக்கும். கவனம் தேவை..

  1. இன்டர்நெட்டிலோ மொபைலிலோ சாட் பண்ணும்போது வேறு புதிய பெண் அறிமுகமானால் கவனமாகப் பேசுங்கள். அது உங்கள் காதலியாகவே கூட இருக்கலாம். உங்களை சோதிக்கும் முயற்சியாக இருக்கும்.

  1. அவர்களுக்கு ஏதாவது தனித் திறமையிருந்தால் (உங்களுக்குப் பிடிக்கலனாலும்) அதனைப் பாராட்டுங்கள்.

  1. ஏற்கனவே தெரிந்த விசயமானாலும் 'அதுதான் எனக்குத் தெரியுமே'னு அசட்டை செய்யாதீர்கள். ஆர்வமாய் அவர்கள் பேச்சை கேளுங்க.

  1. அவர்களிடம் பேசும்போது அதிகாரமோ அட்வைஸோ செய்து அறுக்காமல் கொஞ்சலும் கெஞ்சலுமாகப் பேசுங்கள்.

  1. எங்காவது வெளியூர் சென்றுவந்தால் எல்லாருக்கும் வாங்குவதுபோல பத்தோடு பதினொன்றாக இல்லாமல் அவர்களுக்கென ஸ்பெஷலாக ஏதாவது பரிசு வாங்கிவந்து கொடுங்கள்.

  1. உனக்காக நானிருக்கிறேன் என்றும், நீயில்லாமல் என்னால் இருக்க முடியாது என்றும் அவர்களது உள்ளங்கை பிடித்து அடிக்கடி நம்பிக்கையுடன் சொல்லுங்கள்.

இதெல்லாம் செய்தாலும் அவங்க உங்கள புரிஞ்சுக்கலனா அதுக்கு நாம ஒண்ணும் பண்ண முடியாது, கடவுள் தான் உங்கள காப்பாத்தனும்.


.

Friday, 27 August 2010

பெண்களைக் கவர சில டிப்ஸ்




நானும் என்னென்னவோ பண்ணிப் பாக்குறேன். அந்த ஃபிகர் என்ன திரும்பிப் பாக்கவே மாட்டிங்குதுடா மச்சான்..

இது பெரும்பாலான இன்றைய ஆண்களின் கவலையாக உள்ளது.. (நாட்டுக்கு ரொம்ப தேவ தான்)

பெண்களை கவர்வது பற்றி ஆண்களிடம் நிறையவே குழப்பங்கள் இருக்கு. பொண்ணுங்கள புருஞ்சிக்கவே முடில” ”அந்த ஃபிகர் நல்லாயில்ல மச்சான் அப்டி இப்டினு ஏதேதோ சொல்லி தங்கள தாங்களே சமாதானப்படுத்திக்குவாங்க. (தொப்பி வாங்கினாலும் காட்டிக்கிறதில்ல)

இதோ உங்களுக்கு சில டிப்ஸ்..

1. ஆக்டிவா இருக்கணும்

மந்துனு எதையோ பறிகொடுத்த மாதிரி சோகமா இருக்காம எப்பவுமே துறு துறனு சுறுசுறுப்பா இருக்குற ஆண்களை பெண்களுக்குப் பிடிக்கும். (வெட்டியா இருந்தாலும் பிஸி“னு சொல்லுவோம்ல.. அதுமாதிரி. அதுக்காக அவங்க பக்கத்துல நின்னா கூட கண்டுக்காம ஓவரா பண்ண கூடாது)

2. ஸ்மைலிங் ஃபேஸ்

என்ன தான் டென்சனா இருந்தாலும் அத முகத்தில காட்டாம சாந்தமா ஸ்மைலிங் ஃபேஸா இருக்கணும். (அதுக்காக அவங்க டென்சனா மூட் அவுட்டா இருக்கும்போது கேனத்தனமா சிரிச்சுகிட்டு இருக்கக் கூடாது.)

3. ஓவர் ஆக்‌ஷன் உடம்புக்கு ஆகாது

ஃபிகர் இருக்குதுனு ஓவரா பந்தா பண்ணிகிட்டு இருக்க கூடாது. முக்கியமா தற்பெருமை ரொம்ப பேச கூடாது. நான், என் ஃப்ரண்ஸ், எங்க அம்மா அப்டி இப்டினு சுயபுராணம் பாட்றவன கண்டாலே பொண்ணுங்களுக்கு சுத்தமா பிடிக்காது. அவங்களா கேட்டா மட்டும் சொல்லுங்க போதும். அதே மாதிரி தேவையில்லாம சத்தமா பேசி அனாவசியமா சிரிக்கிறது, வளியிறதெல்லாம் கூடாது. (அதுக்காக சிரிப்பை அடக்குறேன் பேர்வழினு சொதப்பிடாதீங்க..)

4. உடைகள்

பொதுவா (ஆண்கள்) சாதாரணமா டிரஸ் பண்ணினாதான் பொண்ணுங்களுக்குப் பிடிக்கும். எங்கிட்டயும் உடை இருக்குனு காட்றதுக்காக உங்க உடம்புக்கும் உடைக்கும் சம்பந்தமில்லாம உடுத்த வேணாம். கேஷ்வலா டிரஸ் பண்ணுங்க. (ஆனா பொண்ணுங்க மட்டும் அலங்காரமா டிரஸ் பண்ணுவோம்.. நீங்க கேக்க கூடாது)

5. கண்கள்

ஒரு பொண்ணுகிட்ட பேசும்போது உங்க கண்கள் ரொம்பவே முக்கியம். உங்கள் பார்வை எப்படிப்பட்டது என்பதை வைத்துதான் உங்கள் கேரக்டரை அனுமானிப்பார்கள் பெண்கள். நேருக்கு நேராக முகம் பார்த்துப் பேசுவதையே பெரும்பாலான பெண்கள் விரும்புவார்கள். (இனியாவது பேசும்போது வேறு எங்கோ (!!) பார்ப்பது, தரையை நகத்தை செல்போனைப் பார்ப்பது எல்லாம் வேண்டாமே)

6. ஹேர் ஸ்டைல்

கண்டபடி ஹேர்கட் கலரிங் எல்லாம் பண்ணினால் நண்பர்கள் வேண்டுமானால் பாராட்டலாம்.. பெண்களுக்கு எரிச்சல் தான் வரும். சீரான ஹேர்கட், கண்ணை உறுத்தாத கலரிங் (அல்லது முடிந்தவரை கலரிங் பண்ணாமல்) இருந்தால் தான் அவர்களுக்கு பிடிக்கும். (ஒழுங்கா தலைக்கு எண்ணெய் தேய்டா பண்ணாட“னு அவங்க கத்துறது கேக்குதா?)

7. உடலமைப்பு

என்னதான் நீங்கள் குள்ளமாகவோ உயரமாகவோ இருந்தாலும் உடலை எவ்வாறு கட்டமைப்பாக வைத்துள்ளீர்கள் என்பதில் கவனம் தேவை. தொள தொள சதையும் தொப்பையுமாக இருக்கும்பட்சத்தில் அண்ணா என்று ஒற்றை வரியில் அனைத்தையமே முடித்துவிடுவார்கள் பெண்கள்.. எப்போதும் உடம்பை ஃபிட்டாக வைத்துக்கொள்ள முயலுங்கள். (அதுக்காக ஓவரா கை மசில்ஸை காட்டியபடி சட்டை போட்டுகிட்டே திரியாதீங்க)

சிகெரெட் சீக்ரெட்

சிகெரெட் பிடிக்கிற ஆண்களை பார்த்தால் ஸ்டைலாக இருப்பதாக ஒரு வதந்தி இருக்கும். பிடித்த ஆண்களை கூட வெறுக்க வைத்து விடும் இந்த சிகரெட்.. எனவே தூக்கிப் போடுங்கள் அந்த கண்றாவியை. (அவங்க போனதுக்கப்புறம் எடுத்துக்குவீங்க தானே.. )

இது எல்லாத்துக்கும் மேல எப்பவுமே நீங்க நீங்களா இருந்தாலே போதும்.. அடுத்தவங்களுக்காக செயற்கையா நடந்துக்காம இயல்பா இருந்தாலே பெண்களுக்குப் பிடிக்கும்.

இப்ப நான் சொன்னது பொதுவா பெண்களை கவர்வதற்கு என்ன பண்ணனும்னு தான்.

காதலிக்குப் பிடிக்குமாறு எப்படி நடப்பது என்பதை அடுத்து வரும் பதிவுல சொல்றேன்.. சரியா?

Thursday, 26 August 2010

அழகாய் ஒரு ' அ '


வெகு நேரம் ஆகியும் ஓயவில்லை
பக்கத்து வீட்டுச் சிறுவனின் அழுகைச் சத்தம்.
பொறுக்க முடியாமல் பெற்றவளிடம் வினவினேன்.
கோபத்தில் அடித்ததாக சிடுசிடுத்தாள்..
பதிலேதும் பேசாமல் திரும்பி வந்தேன்.

மறுநாளும் தொடரவே மறுபடியும் பதறினேன்..
அடுத்து வந்த நாளும் அப்படியே தொடரவே
பொறுக்கமுடியாமல் துலாவினேன் காரணியை.
சிலேட்டில் ”அ” போடவில்லையாம்.
இதற்கா இப்படி என அங்கலாய்த்தேன்..
தொடர்கிறதே!! என சலித்துக்கொண்டாள்.

பொறுப்பேற்று அழைத்து வந்தேன் அழுபவனை.
விசும்பல் ஓய காத்திருந்து
விளையாட்டுச் சிறுவனிடம் சிலேடெடுத்தேன்.
”யூ டூ புரூட்டஸ்” என்பது போல் பதுங்கினான்.

அடுத்த நாளும் கூட்டி வந்தேன்
முறைத்த தாயை கவனியாதது போல..
ஒருவழியாய் கரம் பிடித்து “அ” முயன்றேன்.
அழகாய் வரவே அடுத்ததாய் அவன் முறையென
தனியே எழுதச் சொன்னேன்..
மழங்க மழங்க விழித்தவன் ௦௦மெதுவாய் கிறுக்கினான்..
முட்டை மட்டும் போட்டுவிட்டு
முழுதாய் தப்பித்தான்.

மறுண்ட விழிகளுடன்
மறுநாளும் அதே பாடு தான்..
மயக்கமே வந்ததாய் மறுபடியும் தொடர்ந்தேன்..
ம்ஹும்...
மாறவே இல்லை அவன் பிடிவாதம்.

நாட்கள் தொடரவே
நானும் திகைத்தேன்..
இன்று மட்டுமென
இளிப்புடன் சலுகை கேட்டேன்..
இனி முடியாது என அனுப்பி வைத்தாள்.

செய்வதறியாது செயல் மறந்து
குழம்பியபடி எழுதியதால்
கோணலானது என் ”அ”வும்..
பார்த்துக் கொண்டிருந்தவன் பட்டென பிடுங்கி
”அய்யே.. இப்டியா போடுவாங்க.. மக்கு..” என்று
எழுதிக் காட்டினான்.. அழகாய் ஒரு ”அ”.

.

Tuesday, 24 August 2010

ராங் நம்பரா? ராங் நபரா?


ஒருமுறை எனக்கு, தெரியாத நம்பர்ல இருந்து ”ஹாய்” மெசெஜ் வந்தது. யார்னு தெரியாதனால பதில் அனுப்பல.. தொடர்ந்து நாலஞ்சு தடவை வந்ததுனால ”Who r u?” அப்டினு அனுப்பினேன். உடனே அந்த நம்பர்ல இருந்து போன் வந்தது. ”திவ்யா இருக்காங்களா”னு ஓரு ஆண் குரல் கேட்டது. நானும் ”இங்க திவ்யானு யாரும் இல்லங்க. சாரி ராங் நம்பர்”னு வச்சிட்டேன். மறுபடியும் ரெண்டு மூணு தடவ, என்னவோ தெரிஞ்சவன் மாதிரி ”எப்படி இருக்கீங்க.. சாப்டீங்களா?? குட் மார்னிங்.. ” அப்டியெல்லாம் மெசெஜ் வந்துகிட்டே இருந்தது. தொடர்ந்து இப்டி வந்ததால எனக்கு கோவம் வந்துடுச்சு. போன் பண்ணி திட்டிட்டேன். இது தான் டாக்டர் நடந்தது.
அவன் என்ன பண்ணினானோ தெரியல.. வேற வேற நம்பர்ல இருந்து தினமும் நெறைய மெசெஜ் வர ஆரம்பிச்சுது. அடிக்கடி போன் பண்ணிட்டே இருந்தாங்க. சில சமயம் காலி மெசெஜா வரும்.. ஒன்னு ரெண்டு இல்ல.. நூற தாண்டி கூட போகும். swith off பண்ணி வைக்கவும் முடியாது. அலுவலக நிமித்தமாகவும் நண்பர்களிடமிருந்தும் அழைப்பு வரும். கடுப்பாகி திட்டி மெசெஜ் அனுப்புவேன். பதிலுக்கு ஏதாவது அசிங்கமான ஜோக் அனுப்பினாங்க. அதயெல்லாம் படிக்கவே முடியாது. வேற வேற நம்பர்ங்குறதுனால கண்டுபிடிக்கவும் முடியல. யாரோ முகம் தெரியாத ஒருத்தனுக்கு எதுக்கு பயப்படனும்னு கண்டுக்காம விட்டுட்டேன்.
இதுல என்ன கொடுமைனா இந்த நபர்கள்ல ஒருத்தனுக்கு என் நண்பர் ஒருவர் போன் செஞ்சு திட்டினார். அதுல இருந்து அவருடைய போனுக்கும் இதே தொந்தரவு தான். இப்போது அவர் நம்பர் மாற்றியதாக கேள்வி.
இவங்க தொடர்ந்து அனுப்பிய நூத்துக்கணக்கான மெசெஜ்னால என் போன் பழுதானது தான் மிச்சம். அதுக்கப்புறம் ஒரு கட்டத்துக்கு மேல நா வேற வழியில்லாம நம்பர மாத்திட்டேன். (என் தோழி ஒருத்தி, அவள் அண்ணன் ஒரு அதிகாரினும் அவர்கிட்ட கம்ப்ளயின்ட் பண்றதாவும் சொல்லி என் சிம் கார்ட வாங்கிட்டுப் போனாள். அதிர்ச்சியான விசயம் என்னனா.. அவ அந்த சிம்ம உபயோகப்படுத்தி அவர்களுக்குள் ஒருத்தன நண்பணாக்கி பேசிகிட்டிருந்தானு எனக்கு அப்புறம் தான் தெரிஞ்சது)
இவங்கள்ளாம் யாரு, இதுனால இவங்களுக்கு என்ன சந்தோசம் கிடைக்குதுனே எனக்குப் புரியல.. இன்றும் எனக்கு மெசெஜ் ரிங்டோன் சத்தம் கேட்டா அலர்ஜியா இருக்கு. இன்னைக்கு இந்த மாதிரியான ராங் நம்பரால பல பெண்களுக்கு பிரச்சனைகள் வருது. இதுனால எவ்வளவு மன உளைச்சல் ஏற்படுதுனு இவங்க ஏன் யோசிக்கிறதே இல்லை??

.

Thursday, 19 August 2010

டாக்டர் என்ற காமெடி பீஸ்கள்


பொதுவா மருத்துவர்கள் மரியாதைக்குரியவங்க தான்.
ஆனா தமிழ் சினிமாவுல வரும் டாக்டர் கதாப்பாத்திரம் இருக்குதே..
அந்த கொடுமைய யார்கிட்ட சொல்றதுனே தெரியல..
லேசா நரச்ச முடி.. சிவப்பு நிறம்.. முடிந்தவரை கண்ணாடி போட்ருக்கணும்.
ஒரு வெள்ளை கோட், குறிப்பா ஸ்டெதஸ்கோப் தோளில் மாட்டியிருக்கணும்..
முக்கியமா ஹீரோவைப் பார்த்து ஒரு காட்சியிலாவது ”இட்ஸ் எ மெடிக்கல் மிராக்கல்” அப்டினு டயலாக் பேசணும்.
முகத்துல ஒரு மாஸ்க்கும் கைல கிளவுசும் போட்டுட்டு ஆபரேசன் தியேட்டர் கதவ தெறந்து வெளிய வந்து (கண்ணாடி போட்ருந்தா அத கழட்டிட்டு) சோகமா தலைய ஆட்டிகிட்டே ”எங்களால முடிஞ்ச அளவு முயற்சி பண்ணோம்.. ஆனா பேசண்ட காப்பாத்த முடில” அப்டினு சொல்லனும்..
காலங்காலமா இந்த இம்சை தான் நடக்குது..

சினிமாவுல தான் இந்த கொடுமையெல்லாம்னு பார்த்தால்.. விளம்பரங்களில் அதை விட இம்சை பண்றாங்க..
மாத்திரைகள், ஆயின்மென்ட்கள் மட்டுமில்லாம டூத் பேஸ்ட் விளம்பரத்துல ஆரம்பிச்சு ஷாம்பு, டேட்ஸ் சிரப், குழந்தைகள் நாப்கின், ஹார்லிக்ஸ், காம்ப்ளான், ஃபேஷ் க்ரீம் இப்படி பெரும்பாலான விளம்பரங்களில் வந்து, ஏதோ ஒரு நிறுவனப் பெயர் சொல்லி (அநேகமா அது வெளிநாட்ல தான் இருக்கும்), இந்த நிறுவனத்தால தரச் சான்றிதழ் பெற்றதுனு வசனம் பேசுவாங்க..
இந்த மாதிரியான (மருத்துவ) கதாப்பாத்திரங்கள் உத்திரவாதம் அளித்தால் தான் மக்கள் நம்புகிறார்கள் என்பது இவர்கள் எண்ணமோ?? அதுக்கு உண்மையான டாக்டர்களையே பேசவைக்கலாம்... அத விட்டுட்டு எங்கயோ ஒரு மாடலிங்கைப் பிடிச்சுட்டு வந்துட்றாங்க..
இதுல என்ன காமெடினா, வேற விளம்பரத்துல அவன் கம்ப்யூட்டர் இஞ்சினியராவோ இல்ல காதலி பின்னாடி சுத்திகிட்டோ நடிச்சிருப்பான்.. அவனுக்கு வெள்ளை கோட் மாட்டி கீழ ஏதோ பெயர் போட்டு பக்கத்துல ஆர்கியாலஜிஸ்ட், நியூராலஜிஸ்ட், டெர்மடாலஜிஸ்ட், ஹேர் ஸ்பெசலிஸ்ட் அப்படினு ஏதாவது போட்ருவாங்க.. (நிரூபிக்கிறாங்களாமா..)
இந்த மாதிரியான காமெடி பீஸ்களை எல்லாம் சகிச்சுக்கணும்னு நம்ம தலைல எழுதியிருக்கு.
என்ன கொடும சார் இது..??
.

Wednesday, 18 August 2010

காகத்தின் விடுமுறைக்காக...



காகம் வடை தூக்கிச் சென்றதாம்..
கதை கேட்டபடி சாதம் உண்டேன்..
ஒரு நாளில்..

கிறுக்கலாக வரைந்த படத்தில்
கருமை கொடுத்து காகம் என்றேன்..
இன்னொரு நாளில்..

தொலைந்த பொருள் எங்கே?
எனக் கேட்டவரிடம்
“காக்கா தூக்கிட்டுப் போய்டுச்சு“ என்று
அழகு காட்டினேன்..
மற்றொரு நாளில்..

காகம் கரைந்தால்
விருந்தாளிகள் வருவார்களாம்..
கொணரும் தின்பண்டத்திற்காக
எதிர்நோக்கி இருந்தேன்..
மேலும் ஒரு நாளில்..

இறந்துபோன தாத்தா
மாறுவேடத்தில் வருவாரென
அப்பா கூறியதை நம்பி
ஓட்டின் மீது படையல் வைத்தேன்..
வேறொரு நாளில்..

பட்டாசுக்கு பயந்து
பறந்தோடும் காகங்களை
வேடிக்கையாய்ப் பார்த்தேன்..
பிரிதொரு நாளில்..

மின்சாரக் கம்பத்தில்
மடிந்த ஒன்றைச் சுற்றி
மற்றவை கரைந்தபோது
வெறுமையாய்ப் பார்த்தேன்..
சுடுதலாக ஒரு நாளில்..

வாட்டிய பசியும்
வறண்டு போன இதயமுமாய்
அண்டைவீட்டு சுவற்றில் வைக்கப்பட்ட
பித்ருக்களின் உணவருகே காத்திருக்கிறேன்
காகத்தின் விடுமுறைக்காக..
இன்றெனும் ஒரு நாளில்..


.

Monday, 16 August 2010

எங்கு போய் முட்டிக்கொள்வது..??


சுதந்திர தின சிறப்பு நிகழ்ச்சிகளைப் பாருங்கள்..
திக்கெட்டும் சுதந்திர ஒளி பரவட்டும்..

தொலைக்காட்சியில் அவ்வப்போது காட்டுக் கத்தல் கத்திக்கொண்டிருந்தனர்..
போனால் போகிறதென்று ஒரு அரை மணி நேரம் இந்திய சுதந்திரத்தைப் பற்றியும் மகாத்மாவைப் பற்றியும் ஏதோ பெரிய மனது பண்ணி ஒளிபரப்பினர்.
அதன் பிறகு வந்தவை எல்லாமே சினிமா சினிமா சினிமா தான்..

பெயருக்கு, நாங்களும் சுதந்திர தினத்தைக் கொண்டாடுகிறோம் போ்வழி என்று, தொலைக்காட்சியின் ஏதோ ஒரு மூலையில் சுதந்திரக் கொடியின் அடையாளத்தை பதித்திருந்தனார்.. அவ்வப்போது எங்கோ ஒரு சேனலில் வந்தே மாதரம் என்று நித்யஷ்ரி மகாதேவணும் லதா மகேஸ்கரும் பாடிக்கொண்டனார்.
ஃபேன்சி சேலையிலும் அயர்ன் செய்த சர்ட்டிலும் தேசியக் கொடியை குத்திக் கொண்டனர்.. மற்றபடி எல்லா நிகழ்ச்சிகளும் முகத்தை சுளிக்க வைக்கும் ஒரே மாதிரியானவைகள் தான்..

பள்ளிகளில் கொடியேற்றும் நிகழ்ச்சியில் பங்கேற்க செல்லாமல் தொலைக்காட்சியில் சிறப்புத் திரைப்படத்தைப் பார்த்துக்கொண்டிருந்த மாணவர்கள்.. நினைக்கவே பெருமையாக இருந்தது..
அடிக்கடி கேசத்தைக் கோதிக்கொண்டே ஒரு தொகுப்பாளினி சுதந்திர தின வாழ்த்துக்கள் சொன்னாள்.. அதோடு மட்டுமின்றி நேயர் விருப்பமாக, கெட்ட ஆட்டம் போடும் நடிகையின் பாடலினை டெடிகேட் செய்தார்.
எந்திரன் உருவான விதமும், நமீதாவின் உடையிறங்கிய தமிழ்ப் (!!!!) பேட்டியும், சிறப்புத் திரைப்படம் என்ற பெயரில் போடப்பட்ட இன்றைய திரைப்படங்களும் நன்றாகவே (!!!) சுதந்திர ஒளியைப் பரப்பியது...

எங்கு போய் முட்டிக்கொள்வது என்று தெரியவில்லை..
இவர்கள் இதனைக் கொண்டாடாமல் விட்டிருந்தாலே சுதந்திர தினம் நன்றாக இருந்திருக்கக் கூடும்..

எங்கோ படித்த வாரிகள் நினைவுக்கு வருகின்றன..

”ஆகஸ்ட் 15..
ஹய்யா..
சுதந்திரம் கிடைத்துவிட்டது..
இனி யாருக்கு வேண்டுமானாலும் அடிமையாக இருக்கலாம்..”
**
மகாத்மா மன்னிப்பாராக..
**

Thursday, 12 August 2010

தலைக்கு வந்த கண்டம்..

காலையில் ஜோசியரைப் பார்த்துவிட்டு வந்ததிலிருந்தே எனக்குப் பதட்டமாக இருந்தது. போதாகுறைக்கு அம்மா வேறு புலம்பி அவனைக் கூடுதலாக தன்பங்கிற்குப் பயமுறுத்திக் கொண்டு இருந்தாள்.

” நீ எங்களுக்கு ஒரே புள்ள ராசா.. ஏற்கனவே ரெண்டு வருசத்துக்கு முன்னாடி நாம பட்டது போதும்பா. அந்த ஜோசியர் சொல்றத கேளு செல்வா.. காளியாத்தா நீ தான் எம்புள்ள கூட துணையா இருக்கணும்..”
கண்ணை கசக்கிக் கொண்டே எழுந்து அடுப்படிக்குப் போனாள்.

அம்மாவின் பயமும் நியாமானது தான். ”இன்னும் அறுபது நாட்களுக்கு உங்கள் பிள்ளையின் தலைக்கு கண்டம் இருக்கிறது.. கவனமாக இருக்கச் சொல்லுங்கள்..” என்று குடும்ப ஜோசியர் ஆணித்தரமாகச் சொன்னால் எந்தத் தாய் தான் பயப்பட மாட்டாள்.

என் குடும்பத்தைப் பொறுத்தவரை அவ்வப்போது அவர் வாக்கு எங்களுக்கு அப்படியே பலித்துவிடும், ரெண்டு வருடத்திற்கு முன் அவர் சொன்னது போலவே என் அப்பாவிற்கு விபத்து நடந்து நூலிலையில் உயிர் தப்பினார். அதற்க்குப் பின் அந்த ஜோசியர் தான் எஙகள் கடவுள்.

அப்பா என்னையே கவலையாகப் பார்த்துக்கொண்டிருந்தார், ”நா சொல்றத கேளு செல்வம். இன்னும் 60 நாளைக்கு நீ எங்கயும் போக வேண்டாம். ஆபீசுக்கு லீவு சொல்லிடு. வெளியவே போகாம வீட்லயே இரு. வீணா விஷப்பரிட்சை வேண்டாம்பா” ஆலோசனை கூறியபடி நகர்ந்தார்.

எனக்கும் அது சரி என்றே பட்டது. ஆனாலும் 60 நாட்கள் என்பது நான்கு சுவற்றிற்குள் கழிக்க முடியாது, அது மட்டுமல்லாது ஒரு ஜோசியதிற்க்கு பயந்து கொண்டு வீட்டுக்குள் ஓடி ஒளிவது எனக்குப் பிடிக்கவில்லை.
தலைக்கு தானே ஆபத்து என்றார்.
தலையில் அடிபடாமல் பாதுகாத்துக்கொண்டால்..
பளிச்சென எனக்கு யோசனை தோன்றியது.

வாகனத்தில் செல்லும்போது போடும் ஹெல்மெட்டை தலையில் மாட்டிக்கொண்டால் என்ன? அது என் தலையைக் காப்பாற்றிவிடுமே..
ஒரு வழியாக யோசித்து முடிவெடுத்தேன்.

இப்போது நானும் என் ஹெல்மெட்டும் ஒட்டிப் பிறந்த இரட்டையராகி விட்டோம். எப்போதும் அதை அணிந்து கொண்டே திரிந்தேன். சாப்பிடும்போது.. அலுவலகத்தின்போது, ஏன் உறங்கும்போது கூட அணிந்து கொண்டேன். அம்மாவிற்கும் பயம் குறைந்தது.

வெற்றிகரமாக கண்டம் இருந்த காலம் முடிந்து விட்டது. நாளையிலிருந்து ஹெல்மெட்டை கழட்டிவிட்டு சுதந்திரமாக வெளியே செல்லலாம். இரண்டு மாதங்களுக்குப் பிறகு இன்றைக்கு தான் நிம்மதியாக உறங்கினேன் (ஹெல்மெட்டோடு).

”டேய் செல்வம்.. கண்டம் முடியட்டும்னு வேண்டிகிட்டு இருந்தேன். அந்த சாமி தான் உன்ன காப்பாத்திடுச்சு. சாயந்திரம் உனக்கு பொண்ணு பாக்கப்
போகணும்டா. ஆபீசுல இருந்து சீக்கிரம் வந்துடுப்பா.” – மறுநாள் காலை குளியலறைக்கு வெளியே அம்மா சொல்வது காதில் விழுந்தது.

மகிழ்ச்சியாக தலையாட்டிவிட்டு முதல்முறையாக ஹெல்மெட்டை கழற்றிய நான்.... அதிர்ச்சியில் உறைந்து நின்றேன்..
கண்டம் எனக்காக காத்து நின்றது..

முழு வழுக்கை என்ற பேரில்.
**
**
அவ்வவ்வ்வ்வ்வ்

Wednesday, 11 August 2010

எல்லாரும் கணக்கு நோட்ட எடுங்க..

ஒண்ணுல இருந்து பத்துக்குள்ள ஒரு நம்பர நெனச்சுக்கங்க..
(எங்கிட்ட ஒன்னும் சொல்ல வேணாம்)

இப்போ நீங்க நெனச்ச நம்பர அதோட மறுபடியும் கூட்டுங்க..
(விரல் கடன் தரமாட்டேன்..)

வந்த விடையோட ஆற (6) கூட்டுங்க..
(கூட்டுன்னா சாப்பிட்ற கூட்டு இல்ல..)


என்ன கூட்டியாச்சா??
கடைசியா விடையா வந்த நம்பர இப்ப சரிபாதியா பிரிங்க..
(சொத்தையா பிரிக்க சொல்றேன்.. சீக்கிரம் பிரிங்கப்பா..)

இப்ப நீங்க மொதல்ல நெனச்ச நம்பர கழிங்க..
(முழிக்க சொல்லல.. கழிக்க சொன்னேன்..)


இருங்க இருங்க.. நீங்க விடை சொல்ல வேணாம்..
நான் தான் சொல்வேனாக்கும்..


மூணு (3).


என்ன சத்தத்தையே காணோம்..
(முறைக்குறீங்களா?? கண்ண நோண்டிடுவேன்..)

எப்படினு கண்டுபிடிச்சுட்டீங்களா??
(சரி சரி இது நமக்குள்ளயே இருக்கட்டும்..)

இத சொல்லிக்குடுத்தது என்னோட பக்கத்து வீட்டு குட்டிப்பொண்ணு..
(”அதான பாத்தேன்”னு சொல்லுவீங்களே..)

Monday, 9 August 2010

கொஞ்சம் வெளிப்படையாக..




என் பெயர் இந்திரா.


என்ன திடீரென்று இந்த அறிமுகம் என்று யோசிக்கிறீர்களா..
முறையான அறிமுகம் எதுவுமே இல்லாமல் தான் நான் பதிவுலகத்தில் காலடி எடுத்து வைத்தேன்.
ஆரம்ப நாட்களில் ஒரு சில வலைப்பூக்களை படித்திருந்தேன். அது போல நாமும் எழுத வேண்டும் என்ற ஆசையால் பதிவுகள் இட ஆரம்பித்தேன்.


வெளிப்படையாக சொல்லவேண்டுமென்றால் பல கசப்பான அனுபவங்களை மறப்பதற்காக, என்னை நானே திசை திருப்புவதற்காகவே எனக்கென ஒரு தளத்தை திறந்தேன். இந்த வலைப்பூ எனக்கு நிறையவே கற்றுக்கொடுத்தது, கொடுத்துக்கொண்டிருக்கிறது.
ஆரம்ப நாட்களில் ஏதோ கடமைக்காக, பதிவுகள் போடவேண்டுமே என்ற எண்ணத்தில் எழுத ஆரம்பித்தேன்... ஆனால் போகப் போக வலையுலகம் என்னைத் தன்பக்கம் வெகுவாக ஈர்த்துக்கொண்டது.. பிற பதிவாளர்களின் வலைகளைப் பார்க்கும்போது எனக்கு பிரம்மிப்பாக இருக்கும். நாமும் நம்மால் முடிந்த அளவு சிறப்பான பதிவுகளை எழுத வேண்டுமென்ற நம்பிக்கையில் தொடர ஆரம்பித்தேன்.


மற்ற நேரங்களில் முடியாதெனினும் வலையுலகத்தில் இருக்கும்போது பல ரணங்கள் மறக்கப் படுகிறது .. இது எனக்கு கிடைத்த மிகப்பெரிய ஆறுதலாக எண்ணுகிறேன்.
இந்த வலையுலகின் மூலம் எனக்கு சில நண்பர்களும் கிடைத்துள்ளனர். அவர்களுக்கு எல்லாம் எனது இந்த ஐம்பதாவது பதிவு மூலம் நன்றியை தெரிவித்துக் கொள்கிறேன்.


என்னை அவ்வப்போது ஊக்கப்படுத்தியதர்க்காக நான் நன்றி சொல்ல விரும்பும் சக பதிவாளர்கள்..


கவிதைக் காதலன்
ஜெய்லானி
சித்ரா
சைவகொத்துபரோட்டா
மங்குனி அமைச்சர்
பட்டாப்பட்டி
வாழ்க்கைப் பயணம்
ஜில்தண்ணி யோகேஷ்
ஜோக்கிரி
காஞ்சி முரளி
வினோ ராஜேஷ்
பிரின்ஸ்
வால்பையன்
கலை
குரு


இன்னும் பட்டியல் நீண்டு கொண்டே போகும். அதனால் நிறுத்திக்கொள்கிறேன்.
இது வரை எப்படியோ.. ஆனால் இனி எனது பதிவுகளை, என்னால் முடிந்த அளவிற்கு சிறப்பாக அமைக்கிறேன். உங்கள் ஆலோசனைகளையும் கருத்துக்களையும் எனக்கு வழங்குங்கள் நண்பர்களே..


இத்துடன் எனது ஐம்பதாவது பதிவு நிறைவு பெறுகிறது. அடுத்த பதிவில் சந்திப்போம்.
.
.

Friday, 6 August 2010

என் அம்மாவுக்குப் பிறந்தநாள்..


வழக்கம்போல காலேல எந்திரிச்சதும் அம்மாவுக்கு போன் பண்ணி வாழ்த்து சொன்னேன். நான் தான் முதல்ல வாழ்த்தினேன்.
ஆரம்பநாட்கள்ள அவங்களோட பிறந்த நாள் என்னைக்குன்னு அவங்களுக்கே தெரியாம தான் இருந்தது..
பாட்டி கிட்ட கேட்டதுக்கு ஆடி மாசம் தான், ஆனா தேதி மறந்துடுச்சுன்னு சொன்னாங்க. அதுனால நான், என் அப்பா, என் சகோதரிகள் எல்லாரும் சேர்ந்து ஆடி மாசத்துல ஒரு தேதி முடிவு பண்ணி வருஷா வருஷம் கொண்டாட ஆரம்பிச்சோம்..
ஆடி 21 .
நீங்களும் வாழ்த்துங்க.. அம்மா ரொம்ப சந்தோசப்படுவாங்க.

அப்புறம் என்னோட முந்தைய பதிவுக்கு பதில் சொல்றேன்னு சொன்னேன்ல..

அது சவப்பெட்டி.

இப்ப என்னோட கேள்வி சரிதானே??

Tuesday, 3 August 2010

உங்களுக்கு ஒரு கேள்வி..

இது ஒரு பொருள்.

இந்தப் பொருளால்
வாங்குபவனுக்கும் மகிழ்ச்சி இல்லை.
விற்பவனுக்கும் மகிழ்ச்சி இல்லை.

இதை உபயோகிப்பவர்க்கோ
தான் இதனை உபயோகித்துக் கொண்டிருக்கிறோம்
என்றே தெரியவில்லை..

அந்தப் பொருள் என்னவென்று யாருக்காவது தெரியுமா?

தெரிந்தவர்கள் சொல்லுங்களேன்..

விடையை எனது அடுத்த பதிவில் சொல்லுகிறேன்..
(அப்பாடா ஒரு பதிவு போட்டாச்சு)

Monday, 2 August 2010

படித்ததில் பிடித்தது..


படுக்கையில்

கழன்று கிடக்கிறது

உன் கொலுசு..

காணாமல் போன

திருகாணியாய்

என் மனசு..

இது என் சொந்த கற்பனை இல்லை..
ஒரு புத்தகத்தில் படித்தேன்.
(திருட்டுப்பதிவு தொல்லை தாங்க முடியல.
அதுக்கு தான் இந்த முன்னெச்சரிக்கை நடவடிக்கை)

Related Posts Plugin for WordPress, Blogger...