“முடியாது“ என்று சொல்லிப் பழகுங்கள்..

தலைப்புல இருக்குற “முடியாது“ங்குற வார்த்தை, தன்னம்பிக்கைய குறைக்குறது தொடர்பானதுனு நீங்க நெனச்சா அது தப்பு. இன்னைக்கு அன்றாட வாழ்க்கைல நண்பர்கள், காதலர்கள், சொந்தக்காரவுங்க, அடுத்த வீட்டுக்காரங்க, ரோட்ல நடக்குற யாரோ சிலர்“னு நிறைய பேரை தினம் தினம் சந்திச்சுகிட்டு இருக்கோம். இவங்களுக்குள்ள ஏதாவது ஒரு சந்தர்ப்பத்துல ஒருத்தரை ஒருத்தர் சார்ந்திருக்க வேண்டிய அல்லது ஏதாவது ஒரு உதவியை எதிர்பார்க்க வேண்டிய சூழ்நிலை ஏற்படலாம். அப்படிப்பட்ட நேரங்கள்ல தன்னால் அவங்களோட எதிர்பார்ப்ப நிறைவேத்த முடியாதுனு நிச்சயமா தோணுறபட்சத்துல “முடியாது“னு வெளிப்படையா சொல்லிடணும். (தலைப்புக்கு வந்துட்டேனா??)

ஒரு சிலர் இருக்காங்க, வெளிப்படையா சொன்னா சம்மந்தப்பட்டவங்க தப்பா நெனச்சுக்குவாங்கனு கவுரவம் பாத்துகிட்டே, பண்ணிட்றேன், பார்க்கலாம், கொஞ்சம் டைம் ஆகும், முயற்சி செய்யிறேன்“னு இழுத்தடிச்சுகிட்டே இருப்பாங்க. அப்புறமா கொஞ்ச நாள் கழிச்சு எவ்வளவோ முயற்சி செஞ்சேன், முடியல“னு அசட்டுத்தனமா சொல்லுவாங்க. இத முதல்லயே சொல்லிருந்தா, அவங்க வேற யார் மூலமாவாவது அந்த காரியத்தை செஞ்சு முடிச்சிருப்பாங்க.

பண விஷயமாகட்டும், பொருள் கடனா குடுக்குற விஷயமாகட்டும்.. அவசரத்துல ஏதாவது வாக்குறுதி குடுத்துட்டு அப்புறம் எப்படி சமாளிக்கிறதுனு தெரியாம முழிக்கிறதே பெரும்பாலானவர்க்கு வழக்கமாய்டுச்சு.

உதாரணத்துக்கு, அலுவலகத்துல நம்மள நம்பி ஒரு வேலைய குடுக்கும்போது, மத்தவங்க முன்னாடி கெத்தா இருக்கும்ணு சரி சரி“னு தலையாட்டிட்டு, அப்புறம் பாத்ரூம் கண்ணாடி முன்னாடி நின்னு “உனக்கேன் இந்த வேண்டாத வேலை??? எப்படி செஞ்சு முடிக்கப்போறோனோ..“னு தன்னைத் தானே திட்டிக்க வேண்டியது.. (ஹிஹிஹி.. எல்லாம் ஒரு அனுபவம் தான்..).

மத்தவங்க நம்மளப் பத்தி புரிஞ்சுவச்சிருக்குறத விட, எப்பவுமே நம்மள நாமே கணித்து வச்சுக்கணும்.. ஒரு குறிப்பிட்ட உதவியை அடுத்தவங்க நம்மகிட்ட கேக்கும்போது, முழுதாகவோ அல்லாது ஓரளவிற்கோ அல்லது முற்றிலும் செய்ய இயலாமலோ.. எந்த அளவுக்கு நம்மளால அதை செய்ய முடியும்னு உணர்ந்தோம்னா உடனே அவங்ககிட்ட நிலைமைய விளக்கி சொல்லிடலாம். பந்தாவுக்கு தலையாட்டிட்டு திருட்டுத்தனமா வேற ஒருத்தர்கிட்ட உதவி கேட்குறதெல்லாம்.... எதுக்கிந்த மானங்கெட்ட பொழப்பு?? அதுக்கு “முடியாது“னு சொல்லித் தொலஞ்சிடலாமே...

இன்னும் தெளிவா சொல்லணும்னா, காதல் விஷயத்தை சொல்லலாம். (இப்ப புரியுமே...). ஒருத்தர பிடிக்கலனாலோ இல்ல காதலிக்கலனாலோ உடனே வெளிப்படையா சொல்லிடலாம், அத விட்டுட்டு மாசக்கணக்கா இழுத்தடிச்சு, நாம ஃப்ரெண்ட்ஸா இருக்கலாம்னு சொல்லி ஒருத்தர காயப்படுத்துறது....... நிராகரிக்கப்பட்றத விட கொடுமையான தண்டனை. ஒருத்தரோட எதிர்பார்ப்ப நிறைவேற்ற முடியாதபட்சத்தில், அதை வெளிப்படையாக ஒப்புக்கொண்டு மன்னிப்பும் கேட்கலாம்.. தப்பேயில்லை.

இந்த பிரச்சனை காதலில் மட்டுமில்ல, நண்பர்களுக்குள்ளேயும் இருக்கு. ஒரு சிலர் இருக்காங்க.. “அவன் என்ன சொன்னாலும் நான் செய்வேன்.. அந்த அளவுக்கு சின்ன வயசுலருந்து பழக்கம்“னு சொல்வாங்க.. நல்ல விஷயம் தான். அதுக்காக, அவன் தண்ணியடிக்கும் போது கம்பெனி குடு“னு சொன்னான். என்னால தட்ட முடியல, அதுனால லைட்டா சாப்டேன்“னு சொல்வாங்க.. “எனக்கு இஷ்டமில்ல, என்னால முடியாது“னு நேருக்கு நேரா சொல்றதுனால என்ன கெட்டுப்போய்டும்??? நண்பன் கிண்டல் பண்ணுவானா?? பண்ணிட்டுப்போகட்டுமே? கையயும் காலையும் கட்டிப்போட்டு வாயத்தெறந்து சங்குல ஊத்துவாய்ங்களா??? இல்லேல. அப்படிப்பட்ட சந்தர்ப்பத்துல, ஆரம்பத்துலயே முகம் சுழிச்சு முடியாதுனு உறுதியா சொல்லிட்டீங்கனா அடுத்த முறை கேட்க யோசிப்பாங்க.

ஏதோ குச்சி மிட்டாயும் குருவி ரொட்டியும் காட்டி ஏமாத்துற மாதிரி, பார்க்கலாம் பார்க்கலாம்னு சொல்லி பதிலைத் தள்ளிப் போடாம, யோசித்துப் பார்த்து உடனுக்குடன் வெளிப்படையா சொல்லிட்றது நல்லது.. வீண் எதிர்பார்ப்பாவது தடுக்கப்படலாம்.

தன்னால முடியுமானு முயற்சி செஞ்சு பாக்கலாம்.. வேணாம்னு சொல்லல. ஆனா அது தனக்குனு வரும் சந்தர்ப்பத்துல செய்யலாம். வீணா நம்மளோட டெஸ்ட்டுக்கு அடுத்தவங்கள கஷ்டப்படுத்தக் கூடாதுனு சொல்றேன். “ஸாரிங்க.. என்னால இந்த செயலை செய்ய முடியும்னு தோணல, நீங்க வேற யார்கிட்டயாவது கேட்டுப்பாருங்க“னு வெளிப்படையா சொல்றதால நம்ம தலைல இருக்குற க்ரீடம் ஒண்ணும் கீழ விழுந்துடாது. தன்னால இயலாத ஒரு செயலுக்கு, தேவையில்லாம உங்க நேரத்தையும் வீணாக்கி அடுத்தவங்க எதிர்பார்ப்பையும் வீணாக்குவது வேண்டாமே.. அதுனால..

“முடியாது“னு சொல்லிப் பழகுங்க...

.

.