சிம்பிளா இருக்காங்களாம்..

”நா ஆபீஸ்ல பர்மிஷன் போட்டுட்டேன். இன்னும் இருபது நிமிஷத்துல அங்க வந்துடுவேன், நீ ரெடியா இரு.. வந்ததும் போகலாம்”

அருண் போன் செய்து தன் மனைவி புஷ்பாவிடம் சொன்னதுதான் தாமதம்.. உடனே ரெடியாக ஆரம்பித்தாள்.

முதலில் பீரோவைத் திறந்து எந்தப் புடவையை கட்டுவது என்பதை யோசித்தாள்.

தனக்குத் தானே மனதுக்குள் பேசிக்கொண்டபடி ரெடியாக ஆரம்பித்தாள்...

”ஜரிகை வச்ச சேலை கட்டலாமா???..

வேணாம் வேணாம் க்ராண்டா தெரியும்... ம்ம்ம் காட்டன் சேலையே கட்டலாம். அது தான் சிம்பிளா இருக்கும்”

”சரி.. காட்டன்ல எந்த கலர் கட்றது??

ம்ம்ம் பிங்க், ரெட், மஞ்சள்.. எல்லாமே பளிச்சுனு இருக்கும். சிம்பிளா தெரியாதே..

அப்டினா க்ரே கலர் கட்டலாம்.. அதுதான் பளிச்சுனு கண்ண உறுத்தாது. பாக்குறதுக்கும் நீட்டா இருக்கும்”

நினைத்தபடியே அந்த புடவையை கட்டிக்கொண்டாள். அதன் பின்..

”ஹேர் ஸ்டைல் எந்த மாதிரி சீவலாம்???? லூஸ் ஹேர் விடாட பின்னிக்கலாம். அதுதான் நல்லா இருக்கும். பூ கூட வேணாம். சிம்பிளா இருக்கட்டும்.”

”வளையல்... கல்லு வச்சது வேணாம். சாதாரண தங்க வளையல் போதும்.. அதுவும் நாலு வேணாம். ரெண்டு போதும். அது தான் சிம்பிளா தெரியும்”

வளையலை அணிந்து கொண்டாள்.

”கல்லு மோதிரம் வேணாம். எப்பவும் போட்றதோட சேர்த்து அந்த வளைவு மோதிரம் மட்டும் போட்டுக்கலாம். அது தான் சிம்பிளா இருக்கும்.”

”வாட்ச்... கோல்டு ப்ரேம் வேணாம். ஸ்ட்ராப் வச்சது போதும்.”

”செயின் எது போடலாம்??? டாலர் வச்சது வேணாம்.. க்ராண்டா இருக்கும். சாதாரண செயின் போடலாம். அதுவும் ரெண்டு வேணாம்.. தாலி செயின் இருக்குறதுனால ஒன்னு மட்டும் போட்டுக்கலாம். அது தான் சிம்பிளா இருக்கும்”

”அட.. தோடு மறந்துட்டேனே.. கல்லு வச்ச ஜிமிக்கி வேணாம். மாட்டல் கூட வேணாம். சாதாரண குடை ஜிமிக்கி மட்டும் போட்டுக்கலாம். அது தான் க்ராண்டா தெரியாது.”

”லிப்ஸ்டிக்> ஐ-ஷாட் எதுவும் வேணாம். பவுடர் போட்டு ஐ-ப்ரோ மட்டும் போட்டுக்கலாம். டிசைன் பொட்டு கூட வேணாம். சாதாரண வட்டப் பொட்டு வச்சுக்கலாம். அப்பதான் சிம்பிளா இருக்கும்.”

”செருப்பு எதைப் போட்றது??? ஹீல்ஸ் வச்சது போடலாமா??? ம்ஹூம்.. வேணாம் வேணாம் ஃப்ளாட் போட்டுக்கலாம். சிம்பிளா இருக்கட்டும்.”

ஒரு வழியாக எல்லாம் முடித்து ரெடியாகிவிட்டாள்.

அருண் காலிங் பெல் அடிக்கும் சத்தம் கேட்டது. சொன்ன நேரத்திற்குள் கிளம்பிய திருப்தியில் ஓடிச் சென்று கதவைத் திறந்தாள் புஷ்பா..

ரெடியாகி நிற்கும் தன் மனைவியை ஏறஇறங்கப் பார்த்த அருண்...

வீடே அதிறும்படி கத்தினான்..

”சனியனே.... எழவு வீட்டுக்கு போகும்போது கூட இப்டி ஆடம்பரமா ட்ரஸ் பண்ணிக்கணுமா?”

.

.