குட்டிக் குட்டிக் கவிதைகள்..

எல்லா இடத்திலும்

பொய் சொல்ல வேண்டியிருக்கிறது..

கண்ணாடியில் சிரிக்கும்பொழுது கூட.

.......................

பேசாதே

வாழ்க்கையின் துயரம் பற்றி..

பேசு

வாழுதலின் துயரம்.

.......................

இன்றைக்கில்லையெனில்

நாளை

நாளையில்லையெனில்

இன்னுமொரு நாள்

இப்படித்தான் தெரியும்

வாழ்வை

நினைவு தெரிந்த நாளிலிருந்து.

.......................

விரைவில் நைந்து

கிழிந்தே போகக்கூடும்..

நான் புரட்டிக் கொண்டேயிருக்கும்

உன் ஞாபகங்கள்.

.......................

எளிதாயிருக்கிறது..

தெரியும் என்கிறதைவிட

தெரியாதிருப்பதாகக்

காட்டிக்கொள்வது.

.......................

சுயமான தேர்வுகளோ

நம்பிக்கையுடனான நிராகரிப்புகளோ

இயலாத பட்சத்தில்

நிகழும் காரியங்களைவிடக்

கனவுகள் போதுமானதாகயிருக்கின்றன.

....................... சல்மா

(ஒரு மாலையும் இன்னொரு மாலையும் புத்தகத்திலிருந்து)

.