போன் பண்ணி பல்பு குடுக்குறானுக...

பொங்கல் லீவெல்லாம் ஒருவழியா முடிஞ்சு அவசரமா அலுவலகத்துக்கு கிளம்பிகிட்டு இருந்தேன். டிஃபன் பாக்ஸ எடுத்து வச்சுகிட்டு இருக்கும்போது என் பெரியப்பா பையன்கிட்ட இருந்து போன் வந்துச்சு. அவன் கோயமுத்தூர்ல ஒரு தனியார் அலுவலகத்துல வேலை பாக்குறான். கிளம்புற வேலைய பாத்துகிட்டே போன அட்டெண்ட் பண்ணி..

“என்னடா இன்னைக்கு ஆபீஸ் போகலயா? இந்நேரம் போன் பண்றியே“னு கேட்டேன்.

“பொங்கல் லீவுக்கு ஊருக்குப் போயிருந்தேன்ல. இப்ப ட்ரெயின்ல திரும்ப கோயம்புத்தூர் போய்கிட்டிருக்கேன். நீ என்ன பண்ற?”னு கேட்டான்.

“கிளம்பிகிட்டு இருக்கேன்டா, ஏன்டா? எதாவது முக்கியமான விசயமா?“னு கேட்டேன்.

“ஏன்? முக்கியமான விசயம்னா தான் போன் பண்ணனுமா? இல்லனா பண்ணக் கூடாதா“னு கிண்டலா கேட்டான்.

“இல்ல.. இந்நேரம் போன் பண்ண மாட்டியே அதான் கேட்டேன். சரி சீக்கிரம் சொல்லுடா.. நா கிளம்பணும். எனக்கு டைம் ஆகுது“னு சொன்னேன்.

“என்னமோ நீ மட்டும் தான் ஆபீஸ் போற மாதிரியும் நாங்கல்லாம் வெட்டியா இருக்க மாதிரியும் பேசுறியே.. ஒரு பத்து நிமிசம் பேசிட்டு கிளம்பு. ஒண்ணும் குடிமுழுகிடாது“னு கோவப்பட்டான்.

அட.. என்னடா இது வம்பா போச்சுனு ““அதுக்கில்லடா.. டைம் ஆச்சு. போன் பேசிகிட்டே கிளம்பினா லேட்டாய்டும், பஸ்ஸ விட்ருவேன். அதுக்கு தான் கேட்டேன். நா வேணும்னா லன்ச்ல கால் பண்ணவா?“னு கேட்டேன்.

”அதெல்லாம் வேணாம். சரி சொல்லு.. இன்னைக்கு என்ன சமையல்?“னான்.

எனக்கு கடுப்பாய்டுச்சு. ”ஏண்டா டேய்.. இத கேக்கவா போன் பண்ணின.. காலங்காத்தால உயிர வாங்காதடா“ன்னேன்.

”அப்புறம் பொங்கல்லாம் எப்படி போச்சு??? ஆபீசெல்லாம் எப்டி போகுது?? இன்னைக்கு என்ன ஸ்பெஷல்?“னு அவன் பாட்டுக்கு பேசிகிட்டே போனான்.

நாசமாப்போறவன்.. கிளம்புற நேரத்துல போன் பண்ணி கதை பேசுறானேனு எரிச்சலாய்டேன்.

”அடேய்.. உனக்குப் பொழுது போகலனா அதுக்கு நான்தானா கெடச்சேன். என்ன தாண்டா சொல்ல வர்ற?“னு கத்தினேன்.

“சரி சரி கோவப்படாத.. என்னோட கேர்ள் ஃப்ரெண்ட், எதுத்த சீட்ல உக்காந்துருக்கா. எங்களுக்குள்ள சின்ன சண்டை. அதுனால பேசமாட்டேனு சொல்லிட்டா“னு சொன்னான்.

“அதுக்கு என்ன என்னடா பண்ண சொல்ற? சொல்றத சீக்கிரமா சொல்லுடா. நேரம் ஆகுது“னு வாட்ச்ச பாத்துகிட்டே டென்சனா பேசினேன்.

”அவ கண்முன்னாடி ஒரு பொண்ணுகிட்ட போன்ல பேசி அவளோட பொசசிவ கிளறினேன்னு வச்சுக்க.. யார்கூட பேசினேனு தெரிஞ்சுக்கணும்குற ஆர்வத்துல என்னோட பேசிடுவா. அதுனால தான் அவளுக்கு கேக்குற மாதிரி உன்னோட ஒரு பத்து நிமிசம் பேசினேன். இப்ப போன வச்சதும் அவ என்கிட்ட வந்து பேசிடுவா. சரி சரி நீ கிளம்பு. நா அப்புறம் பேசுறேன். பை“னு சொல்லிட்டு போன கட் பண்ணிட்டான்.

கொய்யாலே.. காலங்காத்தால எனக்கு பல்பு குடுக்குறதுக்குன்னே போன் பண்ணுவீங்களாடா?????

அந்த நாயால பஸ்ஸ விட்டுட்டு ஆபீசுக்கு லேட்டா போய் திட்டு வாங்குனது தான் மிச்சம்.

அவ்வ்வ்வ்வ்...

.

.