எங்க புத்திசாலித்தனத்த பார்த்து கண்ணு வைக்காதீங்க..

வர வர இந்த செல்போன் தொல்லை தாங்க முடியிறதில்ல. ஏதாவது முக்கியமான வேலை பார்த்துகிட்டிருக்கும் போதோ, இல்ல நல்லா கண் அசந்து தூங்கிகிட்டிருக்கும்போதோ தான் எவனாவது போன் செஞ்சு கழுத்தறுப்பான். அட்டெண்ட் பண்ணாம இருக்கவும் முடியாது, வேலையிருக்கு அப்புறம் பண்ணுங்கனு சொல்லவும் முடியாது. அப்படி சொன்னா உடனே அவங்களுக்கு முனைப்பு வந்திடும்ல.

நேத்து கடைத்தெருவுக்கு டூவீலர்ல, மீசைக்காரனோட போய்கிட்டிருக்கும்போது என் சொந்தக்காரர் கிட்டயிருந்து தொலைபேசி அழைப்பு வந்துச்சு. திரும்ப திரும்ப கால் பண்ணினதால ஏதோ அவசரம் போலனு, வேற வழியில்லாம ஓரமா வண்டிய நிறுத்தி அட்டெண்ட் பண்ணேன். மனுஷன் அப்ப தான் ரொம்ப அக்கறையா “என்ன இந்திரா, நல்லாயிருக்கியா? வீட்ல எல்லாரும் நல்லாயிருக்காங்களா?“னு ஆரம்பிச்சு சகலத்தையும் விசாரிக்க ஆரம்பிச்சுட்டாரு. (யார் அந்த சகலம்னு கேக்கப்படாது சொல்லிப்புட்டேன்..)

நானும் பொறுமையா பதில் சொல்லிட்டு ஒரு வழியா வச்சுட்டேன். ரெண்டே நிமிசத்துல மறுபடியும் போன் வந்துச்சு. யாருனு ஆன் பண்ணி பார்த்தா.. கஸ்டமர் கேர் கடன்காரன். சிம் பத்தின தகவல் தெரியணும்னு சொல்லி கேள்வி மேல கேள்வி... சாபம் விடாத குறையா பதில் சொல்லி கட் பண்ணேன். மறுபடியும் அப்ப தான் வண்டிய ஸ்டார்ட் பண்ணேன்.. திரும்பவும் போன் அடிச்சுச்சு. ஏதோ புது நம்பர்ல இருந்து வந்துச்சு. அட்டெண்ட் பண்ணி ஹலோ சொன்னேன். “ஹலோ பாஸ்கர் இருக்கானா? நா பாலாஜி பேசுறேன்“னு குரல்.. அட ராங் நம்பர்யா“னு முனங்கிட்டு கட் பண்ணேன். அடுத்த அஞ்சாவது நிமிசம், என் தூரத்து சொந்தக்காரப் பொண்ணுகிட்ட இருந்து மிஸ்டு கால்.. கால் மீ“னு ஒரு மெசேஜ் வேற. (நம்மள கலாய்க்கிறதுக்குனே உக்காந்துருப்பாய்ங்களோ,,,??)

ம்ஹூம்.. இது ஆவுறதில்ல.. நம்ம வேலையப் பாக்க விடமாட்டாய்ங்க போலயே.. பேசாம ஸ்விட்ச் ஆஃப் பண்ணலாம்னா வீட்ல இருந்து கால் வந்தா, தெரியாம போய்டும். அதுவுமில்லாம சும்மாவே எங்கம்மா, எங்கள ஊர் சுத்துறோம்னு சொல்வாங்க.. இதுல போன் ஆஃப் பண்ணினா, வேணும்னே ஸ்விட்ச் ஆஃப் பண்ணிட்டு ஊர் சுத்துறோம்னு டென்சன் ஆய்டுவாங்க. அதுனால என்ன பண்ணலாம்னு ஜிந்திச்சேன். அப்ப தான் என் தங்கை, “பசங்க“ படத்துல வர்ற ஒரு சீன்ல, விமல் தன்னோட போன் ஸ்விட் ஆஃப் பண்ணாம பேட்டரிய எடுத்தா கால் பண்றவங்களுக்கு Not Reachable’னு வரும்னு சொல்வாரே.. அத ஞாபகப்படுத்தினா..

நல்ல யோசனைனு சொல்லி நானும் என் மொபைல் போன் பேட்டரிய கழட்டி, சிம் கார்ட வெளிய எடுத்துட்டேன். அப்பாடா.. இனிமேலாவது இவனுக இம்சை இருக்காதுனு கிளம்பினோம். கொஞ்ச நேரத்துலயே எனக்கு அசரீரி கேட்டுச்சு (அட.. மைண்ட் வாய்ஸ் மாதிரிங்க...). என் அலுவலகம் சம்மந்தமா கால் வந்தா என்ன பண்றதுனு...

மீசைக்காரன் கிட்ட சொன்னேன். உடனே சொன்னா பாருங்க ஒரு ஐடியா...

உன் போனுக்கு கால் பண்றவங்களுக்குத் தான் Not Reachable வரும்ல. அதுனால உன் சிம் கார்ட என் போன்ல போட்டுக்க. முக்கியமான கால் எல்லாம் இதுக்கு வந்துடும்னு சொன்னா. சே.. என்னமா ஐடியா குடுக்குறானு பெருமைப்பட்டுகிட்டு உடனே, என் போன்ல கழட்டுன சிம் கார்ட, அவளோட போன்ல போட்டுகிட்டேன். அதுக்கப்புறம் என்ன நடந்திருக்கும்னு உங்களுக்கே தெரியும்.

எப்படி அவளோட ஐடியா????? என் தங்கைல... புத்திசாலியா தான் இருப்பா.

.

.