எல்லோர்க்கும் ஏதாவதொரு..

எல்லோருக்கும் ஏதாவதொரு கோழைத்தனம்

இருக்கத்தான் செய்கிறது..

தூக்கு மாட்டியவன் ஊன்று முயன்று

தோற்றுப்போன பெருவிரல் போல...

எல்லோருக்கும் ஏதாவதொரு நம்பிக்கை

இருக்கத்தான் செய்கிறது..

வெளிச்சென்ற மூச்சு அடுத்த நொடி

உள்வரும் என்பதைப் போல..

எல்லோருக்கும் ஏதாவதொரு ஏமாற்றம்

இருக்கத்தான் செய்கிறது..

சப்பி வந்த குச்சி மிட்டாயைத் தவறவிட்ட

குழந்தை மனம் போல..

எல்லோருக்கும் ஏதாவதொரு சந்தோசம்

இருக்கத்தான் செய்கிறது..

ஒப்பாரியின் நடுவிலும் கவனம் ஈர்க்கும்

மழலைச் சிரிப்பு போல..

எல்லோருக்கும் ஏதாவதொரு கோபம்

இருக்கத்தான் செய்கிறது..

இயலாமையின் போது கண்ணாடிமுன்

திட்டிக்கொள்ளும் ஆற்றாமை போல..

எல்லோருக்கும் ஏதாவதொரு காதல்

இருக்கத்தான் செய்கிறது..

அடைத்த கதவின் இடுக்கிலும் கசியும்

சாரல் மழை போல..

எல்லோருக்கும் ஏதாவதொரு வெறுமை

இருக்கத்தான் செய்கிறது..

புறப்பட்ட பயணத்தில் பெறப்பட்ட

கடைசி கையாட்டல் போல..

எல்லோருக்கும் ஏதாவதொரு காரணங்கள்

இருக்கத்தான் செய்கிறது..

வாழ்வின் நொடிகளை நகர்த்துவதற்கான

சமாளிப்பு நடிப்புகள் போல..

.

.